មន្ត្រីលេខាធិការដ្ឋាននៃគណៈកម្មការគ្រប់គ្រងគម្រោង ហូកា ចុះត្រួតពិនិត្យគុណភាព និងវាយតម្លៃសមត្ថភាពលើជំនាញបដិសណ្ឋារកិច្ចក្នុងខេត្តរតនគិរី

មន្ត្រីលេខាធិការដ្ឋាននៃគណៈកម្មការគ្រប់គ្រងគម្រោង ហូកា ចុះត្រួតពិនិត្យគុណភាព និងវាយតម្លៃសមត្ថភាពលើជំនាញបដិសណ្ឋារកិច្ចក្នុងខេត្តរតនគិរី
នាថ្ងៃទី ០៩-១០ ខែកុម្ភៈ ឆ្នាំ២០២៦ កញ្ញា លីន លីសា និងកញ្ញា នីម ដាលីន មន្ត្រីលេខាធិការដ្ឋាននៃគណៈកម្មការគ្រប់គ្រងគម្រោង ហូកា (HoKa) បានចុះបេសកកម្មដើម្បីត្រួតពិនិត្យគុណភាពបណ្តុះបណ្តាល និងវាយតម្លៃសមត្ថភាពក្រោយវគ្គបណ្តុះបណ្តាលលើជំនាញសេវាកម្មម្ហូបអាហារ និងភេសជ្ជៈ ក្នុងខេត្តរតនគិរី។ ក្នុងកិច្ចដំណើរការនេះ មានសិក្ខាកាមចូលរួមសរុបចំនួន ២១ នាក់ (ស្រី ១៦ នាក់) ក្នុងនោះរួមមានសិក្ខាកាមជាជនជាតិដើមភាគតិចចំនួន ១៨ នាក់ផងដែរ។
វគ្គបណ្តុះបណ្តាលពេញម៉ោងនេះ បានប្រព្រឹត្តទៅក្នុងរយៈពេល ០៦ ថ្ងៃ ចាប់ពីថ្ងៃទី ០២ ដល់ថ្ងៃទី ០៧ ខែកុម្ភៈ ឆ្នាំ២០២៦ នៅមន្ទីរទេសចរណ៍ខេត្តរតនគិរី ក្រោមការបង្ហាត់បង្ហាញដោយគ្រូបង្គោល ហូកា ដែលមានការទទួលស្គាល់ជាផ្លូវការពីក្រសួងទេសចរណ៍ ដើម្បីផ្តល់នូវចំណេះដឹង និងជំនាញវិជ្ជាជីវៈកម្រិតស្តង់ដារជូនដល់សិក្ខាកាម។
ក្នុងគោលបំណងធានានូវសេចក្តីសម្រេចបាននូវគុណភាពនៃការបណ្តុះបណ្តាល សិក្ខាកាមទាំងអស់ត្រូវបានតម្រូវឱ្យឆ្លងកាត់ការវាយតម្លៃសមត្ថភាពដែលផ្តោតលើការអនុវត្តជាក់ស្តែង តាមរយៈវិធីសាស្ត្រចំនួនពីរគឺ៖ ការសម្ភាសន៍ផ្ទាល់មាត់ (Oral Questions) និងការបង្ហាញការអនុវត្តផ្ទាល់ (Demonstration)។ ទន្ទឹមនឹងនេះ ក្រុមការងារលេខាធិការដ្ឋាន គ.គ.ហ. ក៏បានសម្របសម្រួលកិច្ចការត្រួតពិនិត្យគុណភាព (Quality Check) ដើម្បីធានាឱ្យបាននូវតម្លាភាព និងប្រសិទ្ធភាពនៃកម្មវិធីបណ្តុះបណ្តាល។