លេខាធិការដ្ឋាន នៃគណៈកម្មាធិការគ្រប់គ្រងគម្រោងហូកា បានរៀបចំកិច្ចប្រជុំបច្ចេកទេស ស្ដីពី “ការពិនិត្យមើលកម្រងសមត្ថភាព និងស្តង់ដាសមត្ថភាព សម្រាប់គុណវុឌ្ឍិជាតិទេសចរណ៍ វិញ

[English Below]
នារសៀលថ្ងៃទី២៥ ខែវិច្ឆិកា ឆ្នាំ២០១៥ លេខាធិការដ្ឋាន នៃគណៈកម្មាធិការគ្រប់គ្រងគម្រោងហូកា បានរៀបចំកិច្ចប្រជុំបច្ចេកទេស ស្ដីពី “ការពិនិត្យមើលកម្រងសមត្ថភាព និងស្តង់ដាសមត្ថភាព សម្រាប់គុណវុឌ្ឍិជាតិទេសចរណ៍ វិញ្ញាបនបត្រ ១, ២ និង ៣ លើជំនាញការិយាល័យជួរមុខ”។
កិច្ចប្រជុំមានការចូលរួមពីតំណាងក្រុមហ៊ុន អេ ធី ភី ខន់សាល់ធិន អង្គការ Swisscontact លោក/លោកស្រី គ្រូបង្គោលជាតិ អ្នកវាយតម្លៃជាតិ និងមន្ត្រីជំនាញនាយកដ្ឋានបណ្តុះបណ្តាលជំនាញវិជ្ជាជីវៈទេសចរណ៍ សរុបប្រមាណ ៣០ រូប។
កិច្ចប្រជុំបានចូលរួមបើក និងសំណេះសំណាល ដោយលោក ចឹក គារុណ អនុប្រធាននាយកដ្ឋានបណ្តុះបណ្តាលជំនាញវិជ្ជាជីវៈ តំណាងឲ្យលោក ជួប រតនា ប្រធាននាយកដ្ឋានបណ្តុះបណ្តាលជំនាញវិជ្ជាជីវៈទេសចរណ៍ និងជាប្រធានលេខាធិការដ្ឋាន គ.គ.ហ។
បន្ទាប់មក អង្គប្រជុំបានស្តាប់បទបង្ហាញរបស់លោកស្រី សាយ៉ា ម៉ារតា ប្រធានក្រុមអ្នកជំនាញសរសេរកញ្ចប់ស្តង់ដាបណ្តុះបណ្តាលផ្នែកផលិតកម្មម្ហូបអាហារ ដែលមានប្រធានបទ “ការអភិវឌ្ឍកញ្ចប់ស្តង់ដាជាតិសមត្ថភាពវិស័យទេសចរណ៍ និងការចូលរួមពីវិស័យឯកជនក្នុងដំណើរការរៀបចំ”។
បទបង្ហាញបានផ្តោតសំខាន់លើដំណើរការរៀបចំបង្កើតគុណវុឌ្ឍិជាតិវិជ្ជាជីវៈទេសចរណ៍ លើវិញ្ញាបនបត្រ ១, ២ និង ៣ ស្របតាមគុណវុឌ្ឍិជាតិកម្ពុជា ដែលជាយន្តការសំខាន់មួយ ក្នុងការជំរុញការបណ្តុះបណ្តាលវិជ្ជាជីវៈឲ្យមានគុណភាព និងសម្របសម្រួលតាមយន្តការរួមតែមួយ។
បន្ថែមពីនេះ អង្គប្រជុំក៏បានស្តាប់បទបង្ហាញពីមន្ត្រីជំនាញ ស្ដីពី “ការអភិវឌ្ឍកម្រងសមត្ថភាពស្នូលសម្រាប់វិស័យទេសចរណ៍ ផ្នែកការិយាល័យជួរមុខ កម្រិត ១–៥” ដែលបង្ហាញអំពីការរៀបចំ និងចងក្រងឯកសារទ្រទ្រង់សម្រាប់អភិវឌ្ឍកម្រងសមត្ថភាពលើជំនាញការិយាល័យជួរមុខ ដោយមានការប្រៀបធៀប និងសម្របសម្រួលរវាងក្របខ័ណ្ឌគុណវុឌ្ឍិជាតិ និងក្របខ័ណ្ឌគុណវុឌ្ឍិអាស៊ាន។
ជាលទ្ធផល អង្គប្រជុំបានពិភាក្សា និងទទួលយោបល់ចូលពីភាគីពាក់ព័ន្ធ ដើម្បីកែសម្រួល និងលើកកម្ពស់ខ្លឹមសារកម្រងសមត្ថភាពស្នូលឲ្យកាន់តែប្រសើរឡើងទៀត។