អ្នកជំនាញ ៧៧ រូប ទទួលបានការទទួលស្គាល់ជាគ្រូបង្គោល និងអ្នកវាយតម្លៃបង្គោលជាតិ ស្របតាមស្តង់ដាអាស៊ាន!!
ខេត្តសៀមរាប៖ នាថ្ងៃទី២៩ ខែមករា ឆ្នាំ២០២៦ លោកជំទាវ វណ្ណ សេរីរ័ត្ន អនុរដ្ឋលេខាធិការក្រសួងទេសចរណ៍ តំណាងដ៏ខ្ពង់ខ្ពស់របស់ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានអញ្ជើញជាអធិបតីក្នុងពិធីបិទវគ្គបណ្តុះបណ្តាលគ្រូបង្គោលជាតិ នៃសេវាកម្មសណ្ឋាគារ ស្របតាមស្តង់ដាអាស៊ាន ចំនួន ៣៦ រូប។ ក្នុងឱកាសនោះ ក៏មានការរៀបចំពិធីប្រគល់វិញ្ញាបនបត្រជូនដល់សិក្ខាកាមចំនួន ៤១ រូប ដែលបានបញ្ចប់វគ្គបណ្តុះបណ្តាលជាអ្នកវាយតម្លៃបង្គោលជាតិ នៃសេវាកម្មសណ្ឋាគារ ស្របតាមស្តង់ដាអាស៊ានដោយជោគជ័យ។
វគ្គបណ្តុះបណ្តាលនេះត្រូវបានរៀបចំឡើងដោយឥតគិតថ្លៃ ចាប់ពីថ្ងៃទី២៣ ដល់ថ្ងៃទី២៩ ខែមករា ឆ្នាំ២០២៦ នៅខេត្តសៀមរាប។ កម្មវិធីសិក្សាបានផ្តោតសំខាន់លើសសរស្តម្ភពីរនៃស្តង់ដាអាស៊ាន រួមមាន៖ (១) វិធីសាស្ត្រប្រើប្រាស់ប្រអប់បណ្តុះបណ្តាលអាស៊ាន (ASEAN Toolboxes) និង (២) បច្ចេកទេសរៀបចំផែនការបណ្តុះបណ្តាល និងវិធីសាស្ត្រគរុកោសល្យ។
គិតមកទល់ពេលនេះ ក្រោមយន្តការអាស៊ាន ក្រសួងទេសចរណ៍បានបណ្តុះបណ្តាលគ្រូបង្គោល និងអ្នកវាយតម្លៃបង្គោលអាស៊ានចំនួន ៣០ រូប (កម្រិតតំបន់) ដែលបានបន្តផ្ទេរចំណេះដឹងដល់គ្រូបង្គោល និងអ្នកវាយតម្លៃបង្គោលកម្រិតជាតិបានចំនួន ៨៦៩ រូប។ ការកសាងសមត្ថភាពនេះ គឺជាយុទ្ធសាស្ត្រគន្លឹះក្នុងការអភិវឌ្ឍមូលធនមនុស្ស ដើម្បីជំរុញវិស័យទេសចរណ៍កម្ពុជាឱ្យមានភាពប្រកួតប្រជែងខ្ពស់។ ជាកិច្ចបញ្ចប់ លោកជំទាវអនុរដ្ឋលេខាធិការ ក៏បានប្រគល់វិញ្ញាបនបត្រទទួលស្គាល់ជាផ្លូវការជូនដល់គ្រឹះស្ថានអប់រំចំនួន ២ និងសាលាបណ្តុះបណ្តាលវិជ្ជាជីវៈទេសចរណ៍ថ្មីចំនួន ១ ផងដែរ។
